ЖИНОЯТГА ЖАЗО МУҚАРРАР

ЖИНОЯТГА ЖАЗО МУҚАРРАР Жиноят жазосиз қолмайди ёхуд қалбаки пул ясовчининг қинғирлиги фош бўлди...Дунёда қалбаки пуллар тарихи ҳақиқий пуллар яратилган пайтданоқ бошланган бўлиб, ҳозирги даврда ҳам бутун дунёда қалбаки пуллар ясалмоқда ва муомалага киритилмоқда. Шу сабабли ҳуқуқни ҳимоя қилиш органлари уларни ясаб муомалага киритувчиларга қарши жиддий кураш олиб боради. Кимлардир бу ишни осон пул топиш учун ва тезроқ бойиб кетиш илинжида шу жиноятга қўл уради. Гурланлик Икром Қўлдашев ҳам (исм-фамилиялар ўзгартирилган) улардан бири эди. “Қаҳрамонимиз” муқаддам содир қилган жиноятлари учун бир неча бор суднинг қора курсисига ўтириб чиққанлигидан хулоса қилмаган кўринади, бўлмаса сўнгги бор қилган жинояти учун жазони ўтаётган даврида ҳам яна жиноят содир қилмаган бўлармиди Хуллас, сиз танишаётган ушбу воқеа бундай бўлган, Ҳазорасп туманидаги “Ҳазорасп универсал савдо комплекси” АЖда якка тадбиркорлик билан шуғулланувчи Зайнаб Каримованинг (исм-фамилиялар ўзгартирилган) дўконига 2021 йил 30 ноябрь куни савдо қилиш учун нотаниш эр-хотин келиб оёқ кийими кўришган ва И.Қ. турмуш ўртоғига ёнидаги долларини сўмга алмаштириб келаман деб чиқиб кетиб, орадан 5-10 дақиқалар ўтиб қайтиб келган ва улар дўкондан 3.600.000 сўм миқдорида савдо қилишиб, эркак киши, яъни И.Қ. ёнидан 10.000 сўмлик ва 1.000 сўмлик купюрадаги пуллардан жами 3.600.000 сўм пулларни сотувчига берган. Шундан кейин, улар сотиб олган нарсаларни олиб чиқиб кетишганларидан сўнг, сотувчи аёлда пулларнинг ҳақиқий эканлигига шубҳа туғилади ва дарҳол ҳали дўкондан узоқлашишга улгурмаган эр-хотинларнинг орқасидан бориб “Қалбаки пулларни берибсиз” – деб айтади ҳамда бу ҳақида туман ИИБ ходимларига хабар беради. Суд жараёнида, И.Қ. 2021 йил сентябрь ойларида ўзининг яшаш уйида шунчаки қизиқиб кўриб, уйидаги ўзига тегишли бўлган рангли принтерда ёнида бўлган 1.000 сўмлик, 2.000 сўмлик ва 10.000 сўмлик купюрадаги пулларни оддий оқ қоғозга нусхалаб олганлигини, ушбу пуллар чиройли бўлиб нусхаланганлигини, шундан кейин у 1.000 сўмлик купюрадаги пулдан жами 1425 дона, 2.000 сўмлик купюрадаги пулдан жами 69 дона ва 10.000 сўмлик купюрадаги пулдан жами 403 дона нусхалаб, кейин уларни текис қилиб пул шаклида кесиб чиққанлигини, шунда унинг ясаган қалбаки пуллари жами 5.593.000 сўмни ташкил қилганлигини, олдин ушбу пуллардан фойдаланиш мақсади бўлмаганлигини, у ушбу пулларни ясаган пайтида уйида ҳеч ким бўлмаганлигини, кейинчалик пулдан қийналганлиги сабабли мазкур пулларни ўтказиш мақсади ҳаёлига келганлигини, шундан кейин у 2021 йил 30 ноябрь куни турмуш ўртоғи билан биргаликда Ҳазорасп туманида жойлашган “Ҳазорасп Унверсал савдо комплекси”га бориб битта дўкондан ўзи ёнида олиб келган қалбаки пуллардан 3.600.000 сўм пулни сотувчи қизга бериб савдо қилганликларини, лекин қинғир иши дарҳол фош бўлганлигини, унинг бу жиноятидан турмуш ўртоғининг хабари бўлмаганлигини, ҳозирда қилган ишидан қаттиқ пушаймонда эканлиги ва айбига тўлиқ иқрорлигини, шунинг учун уни кечиришни ва қонун доирасида енгиллик қилишни сўради. Албатта, бирорта жиноят жазосиз қолмайди. Жиноят ишлари бўйича Боғот туман суди И.Қ.га 3 йил 1 ойга озодликдан маҳрум этиш жазосини тайинлади. Жиноят ишлари бўйича Боғот туман судининг раисиҲикматжон Саидов