БОҒОТДА ҚИШЛОҚ ХЎЖАЛИГИ ХОДИМЛАРИНИНГ СЕМИНАР- ЙИҒИЛИШИ БЎЛИБ ЎТДИ

Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекцияси ва Хоразм вилояти ҳокимлиги ҳамкорлигида Хоразм вилоятида баҳорги дала ишларига тайёргарлик кўриш ва мавжуд қишлоқ хўжалиги техникаларини таъмирлаш ишларига бағишланган кўргазмали семинар-йиғилишлар ташкил этилмоқда. Ана шундай семинарлардан бири куни кеча Боғот туманидаги “Боғот Агро МТП ” МЧЖда ўтказилди. Унда туман ҳокимининг қишлоқ ва сув хўжалиги масалалари бўйича ўринбосарлари, пахта тўқимачилик кластер раҳбарлари, “Агроинспекция”нинг туманлар бўлими бошлиқлари ва техника назорати бўйича инспекторлари, туманлар агросервис МТП раҳбарлари иштирок қилдилар. Семинар-йиғилишни вилоят ҳокимининг қишлоқ ва сув хўжалиги масалалари бўйича ўринбосари котибияти мудири О.Юсупов кириш сўзи билан очиб берди ҳамда тегишли кўрсатма ва тавсияларни берди. Вилоятда баҳорги дала ишларида қатнашадиган қишлоқ хўжалиги техникаларини таъмирлаш ишларини 2022 йил 1 январга қадар якунлаш белгиланган. Бугунги кунда вилоятда 1801 дона культиваторлар, 1024 та чигит экиш сеялкалари, 501 дона чизеллар, 4042 дона тишли бороналар мавжуд бўлиб, туманлардаги Машина трактор паркларида таъмирлашга тортилган. “Инспекторлар томонидан шай ҳолатга келтирилган қишлоқ хўжалиги техникаларининг қай даражада сифатли таъмирдан чиқарилганлиги кўздан кечирилмоқда. Бунда эски эҳтиёт қисмларининг янгисига алмаштирилганлиги, носоз ҳолатга келган деталлардаги камчиликлар бартараф этилгани, техникаларнинг юз қисмида бўёқлаш ишларининг амалга оширилгани кабиларга эътибор қаратилиб, туман МТПларига тортилиши ҳамда таъмирланиши Ўзагроинспекция инспекторлари томонидан тўлиқ назоратга олинган” – дейди, Ўзагроинспекция вилоят бошқармаси Техника ҳолати ва агротехник тадбирларни назорат қилиш бўлими бош инспектори Ф.Рахмонов. Маълумотлар “Ўзагроинспекция”нинг Хоразм вилояти бошқармаси ахборот хизмати @uzagroinxorazm телеграмм каналидан олинди.