Ёшларнинг бебошлиги, уларни суднинг қора курсисига етаклади.
Ёшлик - инсоннинг ўз фаровон ва муносиб келажаги учун замин яратадиган давридир, бундай даврда ўзининг салоҳиятини ошириб борган, жамиятда муносиб ўрин эгаллашга киришган инсоннинг эртаси борлигини англаш мумкин. Аммо, айримлар “Ёшлик – бебошлик” дея ножўя ҳаракатларга қўл уриб жиноят кўчасига кириб қолганини билмай қоляпти. Бундайлар ўз бошига ўзи кулфат сотиб олади, десак хато бўлмайди ва афсуски ҳаётда ўз йўлини топа олмай, ёшлигини завол топтириб, умрини енгил-елпи мақсадларга сарфлаётган ёшлар ҳам орамизда талайгина топилади.
Хусусан, Боғотнинг тоғни урса талқон қилгудай кучга тўлган, айни навқирон ёшлик даврининг авж палласига қадам қўйган йигитлари, 24 яшар Маткаримов Моҳирбек (исм-шарифлари ўзгартирилган), 19 яшар Артиков Мансурбек ва 19 яшар Бердиев Алишерлар ўзларининг бебошликлари орқасидан билиб-билмай босган қадамлари уларни суднинг қора курсисига етаклади.
Ҳалқимизнинг “саёқ юрсанг, таёқ ейсан” иборасини улар эшитмаган, эшитган бўлсалар ҳам мағзини чақмаганлар шекилли, 2022 йил 6 сентябрь куни соат тахминан тунгги 02:30ларда ҳикоямизнинг “қаҳрамонлари” М.М., А.М., ва Б.А.лар фуқаро Бобоев Валишер (исм-шарифи ўзгартирилган) билан ўзаро жанжаллашиб, ушбу жанжал натижасида унинг юз ва танасининг турли соҳаларига қўлларининг муштлари билан уришиб, оёқлари билан тепишиб, уриб дўппослаб, унга тан жароҳати етказишиб, жамиятда юриш-туриш қоидаларини бузганлар.
Суд-тиббий экспертизасининг хулосасига кўра, жабрланувчининг бош мия ёпиқ жароҳати, бош мия чайқалиши, бурун суягининг ёпиқ синиши, ўнг кўзининг атрофида қонталаш ва кўзнинг шиллиқ қавати остига қон қуйилиши, юқори лабининг ички юзасида юзаки лат яра, пешонасида, бурнида, юзида, кўкрак қафасида, белида, ўнг билагида, ўнг қўл панжасида, чап тирсак бўғимида, ўнг ва чап тизза қопқоғи соҳасида, ўнг болдир-ошиқ бўғимида шилинмалар аниқланган.
Уларнинг бу жинояти жазосиз қолмади албатта! жиноят ишлари бўйича Боғот туман судининг ҳукми билан судланувчилар М.М., А.М., ва Б.Ғ.лар безорилик жиноятини содир қилганликда айбли деб топилиб, уларнинг ҳар бирига нисбатан озодликни чеклаш жазоси тайинланиб, жазони ўташ даврида бир қатор таъқиқлар (чеклашлар) қўлланилди.
Афсус, навқирон йигитчаларнинг ўйламай босган биргина қадами уларни суднинг қора курсисига етаклади.
Агар улар ҳам ўз муваффақиятлари билан юрт равнақига ҳисса қўшаётган ёшлардан ибрат олганида, уларнинг ота-оналари фарзандларига бефарқ бўлмаганларида эди бугун ёшлар жиноятчилиги анча камаярди. Адашган ёшлар турли жиноятларга қўл уриб суд курсисида ўтирмаган бўлардилар.
Жиноят ишлари бўйича
Боғот туман суди раиси Ҳ.Саидов
Bosh sahifaga qaytish
