Kiberjinoyatchilikning oldini olish – dolzarb vazifa

Bugungi kunga kelib kiberjinoyatchilikning oldini olish, bu boradagi targ‘ibot ishlarini kuchaytirish, aholining bilim va tushunchalarini boyitish dolzarb vazifalardan biri bo‘lib qolmoqda. Sababi yil sayin axborot-kommunikatsiya vositalaridan foydalangan holda sodir etilayotgan jinoyatlar butun dunyoda ortib bormoqda. Bugun tuman hokimligida Xorazm viloyat IIB kiberxavfsizlik bo‘limi mutaxassislari ishtirokida tashkil etilgan targ‘ibot tadbirida fuqarolarning kiberjinoyatlar qurboniga aylanishining oldini olish, yoshlarning kiber olamdagi tahdidlarga nisbatan bilimlarini oshirish masalalariga to‘xtalib o‘tildi. Ochiq muloqot tarzida kechgan uchrashuvda mutaxassislar tomonidan xodimlarga o‘z shaxsiy ma’lumotlari, bank plastik karta kodlari va boshqa muhim ma’lumotlarni sir saqlash lozimligi, shuningdek, ijtimoiy tarmoqlar orqali jo‘natilayotgan soxta havolalar va yolg‘on qo‘ng‘iroqlar hamda shubhali ilovalardan ehtiyotkor bo‘lish lozimligi ta’kidlab o‘tildi.